धादिङ : धादिङको सदरमुकाम धादिङबेसीमा रहेको सुनगाभा एकेडेमीले निर्वाचन मार्फत विद्यार्थीहरुको नेतृत्व चयन गरेको छ । विद्यार्थीहरुको सिकाई क्रियाकलापलाई प्रयोगात्मक अभ्यास मार्फत जानकारी दिने उद्देश्यले कार्यक्रमको आयोजना गरिएको विद्यालयका भाईस प्रिन्सिपल राधिका लामिछानेले बताउनुभयो ।
विद्यालयको कप्तानमा भएको निर्वाचनमा कक्षा ८ का राजन तामाङ र नवराज सेन्चुरी प्रतिस्पर्धमा थिए । नवराज सेन्चुरीलाई २८ मतले पछि पार्दै राजन तामाङ निर्वाचित हुनुभएको हो । विद्यालयको कप्तानको लागि भएको निर्वाचनमा कूल १ सय ३४ मत खसेकोमा तामाङले ८१ मत प्राप्त गर्नुभयो भने उहाँका प्रतिद्धन्द्धी सेन्चुरीले ५३ मत प्राप्त गर्नुभयो ।
यस्तै विद्यालयको उपकप्तानको लागि भएको निर्र्वाचनमा अमित कुँवरलाई २६ मतको अन्तरले पछि पार्दै अनुजा तामाङ विजय हुनुभएको छ । उपकप्तान पदको लागि भएको निर्वाचनमा विजयी अनुजा तामाङले ६७ मत प्राप्त गर्नुभएको थियो भने उहाँका प्रतिस्पर्धी अमित कुँवरले ४१ मत र आदित्य लगुनले २६ मत प्राप्त गर्नुभएको थियो ।
यस्तै विद्यार्थीहरुको सदन अनुसारको कप्तान र उपकप्तानको पनि निर्वाचन सम्पन्न भएको छ । २९ मत सहित रिदिमा राना मगर रातो सदनको कप्तानमा निर्वाचित हुनुभएको छ । भने उपकप्तामा २३ मत ल्याएर रोनिश श्रेष्ठ विजयी हुनुभएको छ ।
विद्यालयको हरियो सदनमा २२ मतका साथ सुन्नी गुरुङ कप्तानमा र १७ मतका साथ डोल्मा तामाङ उपकप्तानमा निर्वाचित हुनुभएको छ । यस्तै पंहेलो सदनको कप्तानमा २१ मतका साथ सम्राट घिमिरे कप्तानमा निर्वाचित हुनुभएको छ भने १५ मतका साथ मौसम अन्सारी उपकप्तानमा निर्वाचित हुनुभएको छ ।
विद्यालयका निर्वाचित कप्तान , उपकप्तान र सदन अनुसारका कप्तान उपकप्तानलाई फुलमाला र खादा लगाईदिएर बधाई ज्ञापन गरिएको छ । विद्यालयका शिक्षक, अभिभावक, सञ्चालक समितिका पदाधिकारीहरुले नवनिर्वाचित कप्तान उपकप्तानलाई खादा माला लगाईदिएर बधाई ज्ञापन गरेको हो । आज निर्वाचित कप्तान उपकप्तानको कार्यकाल यो वर्षको शैक्षिक सत्र सम्म रहनेछ । विद्यालयमा हुने विभिन्न क्रियाकलापहरु आज निर्वाचित कप्तान उपकप्तानको नेतृत्वमा गरिने विद्यालयले जनाएको छ ।
धादिङ जिल्लाकै पहिलो निजि विद्यालयको रुपमा स्थापित यस विद्यालयमा नयाँ व्यवस्थापन सहित नर्सरीदेखि कक्षा ८ सम्म पढाई सञ्चालन भईरहेको छ ।
