धादिङ : मृत्यु स्वाभाविक प्रक्रिया हो, तर मृत्युपछि गरिने अन्त्येष्टिमा आवश्यक पर्ने सामग्री संकलन अझैपनि धेरै परिवारका लागि चुनौती बन्ने गरेको छ। खासगरी आर्थिक रूपमा कमजोर तथा असहाय परिवारका लागि शव जलाउन दाउरा जोहो गर्नु ठूलो समस्या बन्ने गरेको पृष्ठभूमिमा, बेनिघाट रोराङ गाउँपालिका–७ ले सराहनीय कदम चालेको छ।
वडाअध्यक्ष कुमार बस्नेतका अनुसार आज असार ८ गतेदेखि वडाभित्र निधन हुने व्यक्तिहरूको अन्त्येष्टिका लागि आवश्यक पर्ने दाउरा वडाबाटै निःशुल्क उपलब्ध गराइनेछ। अबदेखि परिवारजनले अन्त्येष्टिका लागि दाउरा खोज्न दौडधुप गर्नुपर्ने झन्झट अन्त्य भएको वडाध्यक्ष बस्नेतले जानकारी दिए।
“वडाभित्रका हरेक नागरिकलाई अन्तिम क्षणसम्म सम्मानजनक व्यवहार होस् भन्ने हाम्रो उद्देश्य हो। दाउराको अभावले कसैको संस्कार प्रभावित नहोस् भन्ने सोचले यो निर्णय लिएको हुँ,” वडाध्यक्ष बस्नेतले बताए।
उनको अनुसार यो सेवा विशेषगरी गरिब, विपन्न र असहाय परिवारलाई राहत दिने उद्देश्यले सुरु गरिएको हो। वडाले आवश्यक दाउरा संकलन तथा व्यवस्थापन गर्ने व्यवस्था मिलाएको छ।
स्थानीय बासिन्दाले वडाको यो निर्णयप्रति स्वागत व्यक्त गर्दै धन्यवाद दिएका छन्। सामाजिक न्याय र सहानुभूतिपूर्ण प्रशासनतर्फ यो कदम एक सकारात्मक उदाहरणका रूपमा हेरिएको छ।
