धादिङ, – धादिङको फुर्के खोलानजिक रहेको पृथ्वी राजमार्गको सूचना बोर्ड करिब चार वर्षदेखि जीर्ण अवस्थामा थियो। यात्रुहरूलाई जानकारी प्राप्त गर्न कठिन हुने अवस्थामा रहेको सो सूचना बोर्ड अब नयाँ स्वरूपमा पुनःस्थापना गरिएको छ – त्यो पनि सरकारी सहयोग वा कुनै संघसंस्थाको पहल बिना, दुई व्यक्तिको व्यक्तिगत खर्चमा।
बेनिघाटस्थित त्रिशूली रिभर साइड रिसोर्टमा कार्यरत सौगात थपलिया र सन्दीप खड्काले समाजप्रतिको उत्तरदायित्व बुझेका छन्। उनीहरूले आफ्नो खर्चमा सूचना बोर्ड पूर्ण रूपमा परिवर्तन गरी यात्रुहरूका लागि जानकारीमूलक र सजिलो बनाएका छन्।
स्थानीय बासिन्दा र यात्रुहरूले उनीहरूको यो पहललाई निकै सकारात्मक रूपमा लिएका छन्। धेरैले सामाजिक सञ्जालमार्फत पनि प्रशंसा व्यक्त गरेका छन्।
स्थानीय तह वा सरोकारवाला निकायको बेवास्ताबीच युवाहरूले यस्तो उदाहरणीय कार्य गर्नु समाजमा सकारात्मक परिवर्तन सम्भव छ भन्ने सन्देश दिन्छ।
“हामीले कुनै प्रचारको लागि होइन, तर यात्रुहरूलाई सहज होस् भनेर यो काम गरेका हौं,” सौगात थपलियाले बताए।
यस्तो प्रेरणादायी कदमले अन्य युवालाई पनि सामाजिक जिम्मेवारीप्रति सजग बन्न प्रेरणा दिने विश्वास लिइएको छ।
