धादिङ – ११ साउन
धादिङ जिल्ला प्राकृतिक स्रोत–साधनले भरिपूर्ण जिल्ला हो, विशेषतः यहाँको गिट्टी–बालुवाले काठमाडौँ उपत्यकाको धेरैजसो घर–निर्माणमा योगदान पुर्याएको छ।
हाल गजुरी गाउँपालिका–५ स्थित बाङेमुडेमा दैनिक रूपमा ठाउँ ठाउँ मा २५ /३० जना भन्दा बढि युवाहरू त्रिशूली नदीबाट बालुवा निकाल्ने कार्यमा व्यस्त छन्। असार, साउन र भदौ महिनालाई बालुवा निकाल्ने मुख्य सिजन मानीन्छ।
एक युवाका अनुसार, “अहिले बालुवा झिक्न सजिलो समय हो। एक गाडी बालुवा भरेबापत हामीलाई ७,००० रुपैयाँसम्म आम्दानी हुन्छ।”
तर यो कार्य पूर्ण सुरक्षित भने छैन। त्रिशूली नदीको तीव्र बहाव, चिसो पानी र जोखिमपूर्ण वातावरणबीच पनि उनीहरू काम गरिरहेका छन्।
यसैबीच, एक भू–स्रोत विज्ञका अनुसार, “चिसो पानीले चिप्लो बालुवा गाडीमा हाल्दा ढुवानी मार्गमा पानी चुवाउने सम्भावना उच्च हुन्छ। यसले सडक बिग्रिने खतरा निम्त्याउँछ।”
स्थानीय युवाको जोश, आयआर्जनको विकल्प र निर्माण क्षेत्रको आवश्यकताबीच समन्वय गर्न जरुरी देखिएको छ। यस कार्यलाई व्यवस्थित गर्न स्थानीय सरकारले उचित नीति, सुरक्षाका उपाय र पूर्वाधार निर्माणमा ध्यान दिन सके जनशक्ति सुरक्षित रहने र स्रोतको दिगो उपयोग सुनिश्चित हुने विज्ञहरूको धारणा छ।
